राष्ट्रवादी काँग्रेस पक्षाच्या वतीने बुधवारी (दि.६) उपमुख्यमंत्री अजित पवारांच्या हस्ते बारामती येथे जाहीरनाम्याचे लोकार्पण करण्यात आले. राजकिय इतिहासात पहिल्यांदाच तालुकानिहाय जाहीरनामा प्रकाशित करणारा राष्ट्रवादी काँग्रेस हा पक्ष ठरला आहे.

इंदापूर तालुक्यासाठी या जाहीरनाम्यात खालील बाबींचा समावेश करण्यात आलेला आहे.

● लाखेवाडी, रेडा, रेडणी, काटी, वरकुटे, निमगाव केतकी, शेळगाव यांसारख्या २२ गावांमधील पिण्याचा आणि सिंचनाच्या पाणीप्रश्नावर मात करण्यासाठी नवीन जलव्यवस्थापन प्रणाली, उजनी धरणातून पाणी आणण्यासाठी तलावांसह कालव्यांची सोय आणि निरा, भीमा नद्यांच्या प्रवाहाला अडवून त्याठिकाणी कोल्हापुरी बंधारे बांधण्यात येणार आहेत 

 ● वालचंदनगरमध्ये अत्याधुनिक सुविधा असलेलं रुग्णालय उभारण्याचा आणि अस्तित्वात असलेल्या सरकारी आरोग्य केंद्रांचे पुनर्विकास करून नव्या सुविधा सुनिश्चित करण्यात येणार आहेत. 

 ● मतदारसंघातील विद्यार्थ्यांच्या सोयीसाठी पंचायत स्तरावर ग्रंथालय स्थापनेचा, शासकीय शाळांच्या अद्ययावत इमारतींच्या बांधकामाचा आणि विद्यार्थ्यांना पोषणयुक्त आहार देण्यासाठी कटिबद्ध राहणार आहेत. 

 ● मतदारसंघातील खराब झालेल्या रस्त्यांपैकी सराटी ते गणेशवाडी रोड, काटी ते सोलनकर वस्ती रोड, बावडा ते भांडगाव रोड, रेडा ते रेडणी या ६ किमी रस्त्यांची दुरुस्ती व पुनर्बांधणी करण्याचा आणि सराटी, लाखेवाडी, भोंडणी, बावडा या गावांतून जाणाऱ्या कालव्याच्या काठावरच्या कच्च्या रस्त्याचे पक्के बांधकाम करण्यात येणार आहे 

 ● सराटी, रेडणी, भोंडणी, लाखेवाडी, निमसाखर, हायवे जवळच्या गावांमध्ये छोटे बस स्टॉप आणि प्रवाशांसाठी बसण्याच्या बाकांची व्यवस्था करण्यात येणार आहे. 

 ● शेतकऱ्यांना नियमितपणे वीज पुरवठा करण्यासाठी नवीन विद्युत उपकेंद्रांची स्थापना, जैविक शेतीसह आधुनिक पद्धतीनं शेती करण्यासाठी शिबिरांचे आयोजन करून शेतकऱ्यांचे धान्य साठवणुकीसाठी कोल्ड स्टोरेज यंत्रणेची स्थापना करण्यात येणार आहेत. 

 ● युवा वर्गाचा विकास साधण्यासाठी एमआयडीसीमध्ये स्थानिक युवकांना प्राधान्य देण्याचा आणि युवकांसाठी प्रत्येक वर्षी तालुका स्तरावर क्रीडा महोत्सवाचे आयोजन करून खेळाडूंना प्रोत्साहन देण्यासाठी कटिबद्ध राहणार आहेत.