पुणे ग्रामीण पोलिसांनी मोठी कारवाई करत आंतरजिल्हा दरोडेखोर टोळीचा पर्दाफाश केला आहे. एकाच रात्री दौंड पोलीस ठाणे हद्दीसह इतर ठिकाणी सशस्त्र दरोडे टाकणाऱ्या टोळीतील आरोपींना जेरबंद करण्यात आले असून त्यांच्याकडून सोन्या-चांदीचे दागिने, रोख रक्कम व इतर मुद्देमाल असा एकूण सुमारे २५ लाख रुपयांचा माल हस्तगत करण्यात आला आहे.

पुणे ग्रामीण जिल्ह्यात मागील काही महिन्यांपासून दौंड, बारामती व जुन्नर विभागात जबरी चोरी, घरफोडी आणि दरोड्याच्या घटनांमध्ये वाढ झाली होती. नागरिकांना मारहाण करून, शस्त्राचा धाक दाखवून लुटमार करणाऱ्या या टोळीचा शोध घेण्यासाठी पोलिस अधीक्षकांच्या मार्गदर्शनाखाली विशेष तपास पथके तयार करण्यात आली होती.

दौंड पोलीस ठाण्यातील दाखल गुन्ह्याचा तपास करताना पोलिसांनी घटनास्थळावरील सीसीटीव्ही फुटेज, तांत्रिक विश्लेषण आणि गोपनीय माहितीच्या आधारे आरोपींचा माग काढला. तपासात आरोपी हे अहमदनगर जिल्ह्यातून येऊन पुणे ग्रामीण भागात गुन्हे करत असल्याचे निष्पन्न झाले.

एकाच रात्री चार ठिकाणी दरोडे

दि. 10 जून 2026 रोजी रात्रीच्या सुमारास दौंड पोलीस ठाणे हद्दीतील बाबीरनगर, आवडेवस्ती, आवाळेवस्ती व खोरवडी या चार ठिकाणी सात दरोडेखोरांनी शस्त्राचा धाक दाखवत नागरिकांना मारहाण केली. यावेळी सोन्याचे दागिने, रोख रक्कम, मोबाईल आणि मोटारसायकल असा सुमारे 7 लाख 10 हजार रुपयांचा मुद्देमाल लुटण्यात आला होता.

तपासादरम्यान गणेश मंगेश काळे (रा. कुळधरण, ता. कर्जत, जि. अहिल्यानगर), विशाल हंबरड्या काळे (रा. चिखली, ता. आष्टी, जि. बीड), किशोर रावण भोसले (रा. बाबुळगाव, ता. कर्जत) यांना ताब्यात घेण्यात आले असून एका विधीसंघर्षित बालकासही ताब्यात घेण्यात आले आहे.

२० गंभीर गुन्ह्यांची उकल

अटक केलेल्या आरोपींकडून पुणे ग्रामीण जिल्ह्यातील दौंड, बारामती, माळेगाव, जेजुरी, जुन्नर, आळेफाटा, यवत आदी पोलीस ठाण्यांमधील दरोडा, जबरी चोरी आणि घरफोडीचे एकूण २० गंभीर गुन्हे उघडकीस आले आहेत. यामध्ये ४ दरोडे, ६ जबरी चोरी आणि ५ घरफोडीच्या गुन्ह्यांचा समावेश आहे.

तसेच आरोपींकडून अहमदनगर जिल्ह्यातील दरोड्याचे ३, जबरी चोरीचे ३ आणि घरफोडीचे २ असे आणखी ८ गुन्हे उघडकीस आले आहेत.

२५ लाखांचा मुद्देमाल जप्त

पोलिसांच्या कारवाईत आरोपींकडून सुमारे १७ तोळे वजनाचे सोन्याचे दागिने, ३२४ ग्रॅम चांदीचे दागिने आणि इतर मुद्देमाल असा बाजारभावाप्रमाणे सुमारे २५ लाख रुपयांचा माल हस्तगत करण्यात आला आहे.

ही कारवाई कोल्हापूर परिक्षेत्राचे विशेष पोलीस महानिरीक्षक रंजन कुमार शर्मा यांच्या मार्गदर्शनाखाली तसेच पुणे ग्रामीणचे पोलीस अधीक्षक संदीप सिंह गिल्ल, पुणे विभागाचे अपर पोलीस अधीक्षक शुभम कुमार, बारामती विभागाचे अपर पोलीस अधीक्षक गणेश बिरादार, बारामती विभाग, दौंड उपविभागाचे उपविभागीय पोलीस अधिकारी बापुराव दडस यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, दौंडचे पोलीस निरीक्षक हेमंत शेडगे, माळेगावचे सहाय्यक पोलीस निरीक्षक कुलदीप संकपाळ, स्थानिक गुन्हे शाखेचे उपनिरीक्षक अभिजीत सावंत, श्रेणी पोलीस उपनिरीक्षक बाळासाहेब कारंडे, स्थानिक गुन्हे शाखेचे पोलीस अंमलदार, शिवाजी निकम, असिफ शेख, सचिन घाडगे, किशोर तेलंग, योगेश नागरगोजे, राजू मोमीण, गणेश धनवे, संतोष भापकर, सुभाष राउत, गुरूनाथ गायकवाड, विकास कापरे, सुलतान डांगे, रईस मुलाणी, तुषार चव्हाण, गणेश डेरे, धिरज जाधव, तुषार भोईटे, स्वप्निल अहीवळे, अजय घुले, गणेश होळकर, गुलाब पाटील, शैलेश स्वामी, राहुल पवार, समाधान नाईकनवरे, पोलीस हवालदार सुजाता कदम, भाउसाहेब पुंड, अजय देडे, दौंड पोलीस स्टेशनचे पोलीस उपनिरीक्षक अब्दुल बिद्री, पोलीस उपनिरीक्षक रुपेश कदम, पोलीस अंमलदार नितीन बोराडे, धनंजय गाढवे, पवन माने, गोरख हजारे, सागर म्हेत्रे, रमेश चितारे, संतोष भोसले, सचिन साप्ते, ओमराज कुमकुटे, महेंद्र लोहार, सोमनाथ चौंडे, किरण पांढरे, संजय कोठावळे, महिला पोलीस अंमलदार वैशाली बनसोडे, काजल शिंदे, ऊरूळी कांचनचे सचिन जगताप, प्रविण चौधर यांनी केली असून पुढील तपास सुरू आहे.