वैवाहिक जीवनातील मतभेद टोकाला गेल्यानंतर न्यायालयीन लढाईपर्यंत पोहोचलेल्या एका प्रकरणाचा शेवट अखेर मध्यस्थीच्या माध्यमातून समाधानकारक पद्धतीने झाला. या प्रकरणात पत्नीला आयुष्यभराची पोटगी म्हणून साडेसतरा लाख रुपये व पाच तोळे सोने मिळाले असून, दोन्ही पक्षांनी परस्पर संमतीने घटस्फोट घेतला आहे. विशेष म्हणजे, केवळ एका वर्षाच्या कालावधीत हे प्रकरण निकाली निघाल्याने दोन्ही कुटुंबांची दीर्घकालीन कोर्टकचेरी टळली.

या प्रकरणात पत्नीने पतीकडून फसवणूक झाल्याचा आरोप करत न्याय मिळवून देण्याची मागणी केली होती. तिला पोटगी तसेच तिचे दागिने परत मिळावेत, अशी भूमिका होती. त्यानुसार ॲड. सुप्रिया विशाल बर्गे यांनी संबंधित न्यायालयात पोटगीची केस दाखल केली. या प्रकरणात पतीसह त्याच्या कुटुंबातील तब्बल २३ जणांना न्यायालयात हजर राहावे लागले.

या यशस्वी मध्यस्थीमुळे दोन्ही पक्षांना नव्याने आयुष्य सुरू करण्याचा मार्ग मोकळा झाला असून, दीर्घकालीन न्यायालयीन संघर्ष टळल्याने समाधान व्यक्त करण्यात येत आहे.