“राणाजी, यकीन करो हमारा,

हम किसीं को धोखा नही देते

मगर धोखा देनेवाले को दुबारा मौका भी नही देते…”

हा भारदस्त डायलॉग सध्या इंदापूर तालुक्यातील राजकीय वर्तुळात चर्चेचा विषय ठरत आहे. इंदापूरचे भाजप नेते प्रविण माने यांनी हा संवाद असलेला व्हॉट्सॲप स्टेटस ठेवल्यानंतर, तो नेमका कोणाला उद्देशून आहे? याबाबत विविध तर्क-वितर्कांना उधाण आले आहे.

विशेष म्हणजे, हे स्टेटस कणखर भूमिका, थेट इशारा आणि ‘एकदाच संधी’चा संदेश देणारा हा संवाद राजकीय संदर्भात वापरला गेल्याने त्याला वेगळेच महत्त्व प्राप्त झाले आहे.

नुकत्याच झालेल्या इंदापूर नगरपरिषद निवडणुकीत प्रविण माने यांनी माजी मंत्री हर्षवर्धन पाटील यांच्यासोबतीने कृष्णा-भीमा विकास आघाडीच्या माध्यमातून स्थानिक आघाडी स्थापन केली होती. या आघाडीच्या नगराध्यक्ष पदाचे उमेदवार होते प्रदीप गारटकर. मात्र, अत्यंत चुरशीच्या लढतीत गारटकर यांचा केवळ १२७ मतांनी पराभव झाला.

या पराभवानंतर अवघ्या काही दिवसांतच, प्रदीप गारटकर यांनी भाजप प्रदेशाध्यक्ष रविंद्र चव्हाण यांच्या उपस्थितीत मुंबईत भाजपमध्ये जाहीर पक्षप्रवेश केल्याने राजकीय समीकरणे बदलली. याच पार्श्वभूमीवर प्रविण माने यांनी ठेवलेला हा स्टेटस अनेक अर्थांनी पाहिला जात आहे.

● जिल्हा परिषद – पंचायत समिती निवडणुका आणि वाढते राजकीय तणाव ●

दरम्यान, पुणे जिल्हा परिषद आणि इंदापूर पंचायत समितीच्या निवडणुका जाहीर झाल्या आहेत. अर्ज भरण्याची प्रक्रिया सुरू होत असतानाच, शरद पवार आणि अजित पवार यांच्या राष्ट्रवादी काँग्रेसकडून एकत्रित निवडणूक लढवण्याची घोषणा लवकरच होण्याची शक्यता वर्तवली जात आहे.

अशा परिस्थितीत, इंदापुरात हर्षवर्धन पाटील यांची राजकीय कोंडी होण्याची शक्यता नाकारता येत नाही. याच संभाव्य बदलत्या राजकीय गणितांच्या पार्श्वभूमीवर प्रविण माने यांनी स्टेटस वरून दिलेला हा इशारा नेमका कुणासाठी आहे, याकडे सर्वांचे लक्ष लागले आहे.

● स्टेटस, संकेत आणि आगामी लढती ●

सध्या तरी प्रविण माने यांनी या स्टेटसबाबत कोणतीही थेट प्रतिक्रिया दिलेली नसली, तरी राजकारणात शब्दांपेक्षा संकेत अधिक बोलके असतात, हे इंदापूरकरांना नव्याने सांगण्याची गरज नाही. आगामी निवडणुकांच्या पार्श्वभूमीवर हा स्टेटस फक्त डायलॉग की राजकीय इशारा हे येणाऱ्या दिवसांत स्पष्ट होणार आहे.