बारामती तालुका पोलीस स्टेशनच्या हद्दीतील मालमत्तेविषयक गुन्हे, शरीराविरुद्धचे गुन्हे तसेच अवैध धंद्यांना प्रतिबंध करण्यासाठी पोलिसांकडून पंचसूत्री कार्यक्रम राबविण्यात येणार आहे. या माध्यमातून गुन्ह्यांना आळा घालण्याबरोबरच गुन्हेगारांवर कठोर कारवाई करण्यात येणार असल्याची माहिती बारामती तालुका पोलीस ठाण्याचे नवनियुक्त पोलीस निरीक्षक नारायण पवार यांनी दिली.

नियंत्रण कक्षातून नुकतीच बारामती तालुका पोलीस ठाण्यात नियुक्ती झाल्यानंतर गुरुवारी (दि.११) आयोजित पत्रकार परिषदेत पोलीस निरीक्षक नारायण पवार यांनी आगामी कामकाजाची दिशा स्पष्ट केली.

गावातील तंटे गावातच मिटविण्यासाठी तंटामुक्ती समिती

गावातील शेतीचे वाद, बांधावरील वाद, रस्त्यांवरील वाद तसेच किरकोळ कारणांवरून होणारे संघर्ष रोखण्यासाठी प्रत्येक गावात तंटामुक्ती समिती कार्यान्वित करण्यात येणार आहे. या माध्यमातून शरीराविरुद्धचे गुन्हे रोखण्यास मदत होणार असून गावातील वाद सामोपचाराने सोडविण्यावर भर देण्यात येणार आहे.

ग्रामसुरक्षा यंत्रणेतून गुन्हे व अवैध धंद्यांवर नजर

मालमत्तेविषयक गुन्हे तसेच अवैध धंद्यांना प्रतिबंध करण्यासाठी ग्राम सुरक्षा यंत्रणा कार्यान्वित करण्यात येणार आहे. या यंत्रणेच्या माध्यमातून गावातील नागरिकांच्या मोबाईलवर एकाच वेळी संदेश व सूचना पोहोचविण्यात येणार आहेत. त्यामुळे आपत्कालीन परिस्थितीत नागरिक व पोलिसांमध्ये तत्काळ समन्वय साधता येणार आहे.

सीसीटीव्ही कॅमेऱ्यांचे जाळे उभारणार

गावातील महत्त्वाची ठिकाणे, चौक व संवेदनशील परिसरात ग्रामपंचायतीच्या माध्यमातून सीसीटीव्ही कॅमेरे बसविण्यात येणार आहेत. यासाठी सरपंच, ग्रामपंचायत पदाधिकारी व ग्रामस्थांनी पुढाकार घ्यावा, असे आवाहन पोलीस निरीक्षक पवार यांनी केले. सीसीटीव्हीमुळे गुन्ह्यांचा तपास करण्यास मोठी मदत होणार आहे.

महिला सुरक्षा समित्यांद्वारे महिलांना संरक्षण

महिलांवरील अत्याचाराच्या घटना रोखण्यासाठी प्रत्येक गावात महिला सुरक्षा समिती स्थापन करण्यात येणार आहे. या माध्यमातून महिलांच्या समस्या जाणून घेऊन वेळीच उपाययोजना करण्यात येणार आहेत.

शाळा व गावांमध्ये जनजागृती अभियान

पोलीस प्रशासनाकडून गावागावात तसेच शाळांमध्ये बैठका घेऊन नागरिकांमध्ये कायदा व सुव्यवस्थेबाबत जनजागृती करण्यात येणार आहे. गावात कोणीही दारू, जुगार किंवा इतर अवैध धंदे करत असल्याचे आढळल्यास त्यांच्यावर कठोर कायदेशीर कारवाई करण्यात येईल, असा इशारा पोलीस निरीक्षक नारायण पवार यांनी दिला.