ए.डी. फाउंडेशन महाराष्ट्र राज्य, सांगली यांच्या वतीने प्रदान करण्यात येणारा प्रतिष्ठेचा “महाराष्ट्र नारीशक्ती समाजरत्न” राष्ट्रीय पुरस्कार-२०२५ अंतर्गत आदर्श शिक्षक पुरस्कार प्रा. डॉ. सुषमा जाधव-गुळूमकर यांना प्रदान करण्यात आला. त्यांच्या शैक्षणिक, सामाजिक आणि महिलांच्या सक्षमीकरणासाठीच्या उल्लेखनीय कार्याची दखल घेत हा सन्मान देण्यात आला आहे.

प्रा. डॉ. सुषमा जाधव-गुळूमकर यांनी शिक्षण क्षेत्रात आदर्शवत कार्य करत अनेक विद्यार्थ्यांना संस्कारक्षम घडवले आहे. त्याचबरोबर मराठा सेवा संघ प्रणित जिजाऊ ब्रिगेडच्या माध्यमातून महिलांमध्ये जनजागृती, सामाजिक प्रबोधन आणि विविध लोकोपयोगी उपक्रम प्रभावीपणे राबवले आहेत. त्यांच्या या कार्याचे समाजातून सर्व स्तरांतून कौतुक होत आहे.

आदर्श शिक्षक पुरस्कार प्राप्त झाल्यानंतर त्यांनी सहयोग, बारामती येथे उपमुख्यमंत्री सुनेत्रा पवार यांची सदिच्छा भेट घेतली. यावेळी उपमुख्यमंत्री सुनेत्रा पवार यांनी स्वतःच्या हस्ते पुरस्कार, सन्मानचिन्ह आणि मेडल प्रदान करून त्यांचा विशेष सत्कार केला. हा पुरस्कार त्यांच्या कार्याची पोचपावती असल्याचे सांगत त्यांनी प्रा. डॉ. गुळूमकर यांच्या कार्याचे कौतुक केले.

या सन्मानामुळे “माझा आनंद गगनात मावेनासा झाला आहे,” अशी भावना प्रा. डॉ. सुषमा गुळूमकर यांनी व्यक्त केली. तसेच ए.डी. फाउंडेशन महाराष्ट्र राज्य आणि उपमुख्यमंत्री सुनेत्रा पवार यांचे त्यांनी मनःपूर्वक आभार मानले.

यावेळी बारामती तालुका जिजाऊ ब्रिगेड अध्यक्षा विद्याराणी चव्हाण, उपाध्यक्षा शारदा मदने, कार्याध्यक्ष शीलाराणी रंधवे, राष्ट्रवादी काँग्रेस सोशल मीडिया विभागाचे महाराष्ट्र प्रदेश उपाध्यक्ष सुनिल बनसोडे तसेच युवा सामाजिक कार्यकर्ते प्रितम गुळूमकर आदी मान्यवर उपस्थित होते.