पाठ्यपुस्तकातील ज्ञानाला प्रत्यक्ष संशोधनाची जोड मिळाली, की शिक्षणाचा अनुभव अधिक समृद्ध होतो. याच उद्देशाने विद्या प्रतिष्ठानच्या कला, विज्ञान व वाणिज्य महाविद्यालयातील सूक्ष्मजीवशास्त्र विभागाच्या तृतीय वर्ष विज्ञानच्या विद्यार्थ्यांनी राष्ट्रीय अजैविक ताण व्यवस्थापन संस्थेला (NIASM), बारामती येथे अभ्यासभेट दिली.

सावित्रीबाई फुले पुणे विद्यापीठाच्या राष्ट्रीय शैक्षणिक धोरण २०२० (NEP 2020) अंतर्गत अनुभवाधारित शिक्षणाचा भाग म्हणून आयोजित या भेटीत विद्यार्थ्यांनी कृषी संशोधन, सूक्ष्मजीवशास्त्र, जैवरसायनशास्त्र, किण्वन तंत्रज्ञान आणि कृषी जैवतंत्रज्ञान यांचा प्रत्यक्ष अनुभव घेतला. येऊ घातलेल्या दुष्काळी परिस्थितीवर मात करता यावी यासाठी संस्थेतील शास्त्रज्ञांशी संवाद साधताना दुष्काळ, क्षारता व अतिउष्णता यांसारख्या अजैविक ताणांचा पिकांवर होणारा परिणाम आणि त्यावरील वैज्ञानिक उपाययोजनांची माहिती देण्यात आली.

या भेटी दरम्यान संशोधन प्रयोगशाळा, आधुनिक वैज्ञानिक उपकरणे, निर्जंतुक तंत्रे, नमुना हाताळणी, प्रयोगशाळेतील सुरक्षितता तसेच संशोधन नोंदींचे महत्त्व विद्यार्थ्यांनी जाणून घेतले. संशोधन प्रक्षेत्राच्या भेटीत पर्यावरणीय घटक, वनस्पतींची वाढ आणि पीक उत्पादकता यांतील परस्परसंबंधही उलगडले. वर्गातील संकल्पना प्रत्यक्ष प्रयोगांशी जोडणारा हा अनुभव विद्यार्थ्यांमध्ये वैज्ञानिक दृष्टिकोन, संशोधनवृत्ती आणि नवोपक्रमाची प्रेरणा निर्माण करणारा ठरला आणि त्यामुळे अविष्कार संशोधन स्पर्धेत प्रकल्प सादर करताना त्यांचा आत्मविश्वास वाढीस लागला.

प्राचार्य डॉ. भरत शिंदे, उपप्राचार्य प्रा.डॉ.प्रदीप पाटील, विभाग प्रमुख आणि उपप्राचार्या प्रा. नीलिमा पवार पेंढारकर यांच्या मार्गदर्शनाखाली ही भेट आयोजित करण्यात आली. अभ्यासभेट समन्वयक प्रा. नीलिमा देवी अडुसुमल्ली यांनी नियोजन केले. प्रा. योगिता चौधरी, प्रा. किरण गावडे तसेच NIASM चे संचालक व प्रशासकीय सोशल विंग यांनी दिलेल्या सहकार्याबद्दल विभागाने कृतज्ञता व्यक्त केली.