नागरिकांचे हरविलेले मोबाईल शोधून ते मूळ मालकांना परत देण्याची उल्लेखनीय कामगिरी माळेगाव पोलीस ठाण्याने केली आहे. पोलिसांनी तांत्रिक विश्लेषणाच्या आधारे महाराष्ट्र व कर्नाटक राज्यातील विविध ठिकाणांहून ७ मोबाईल शोधून काढले असून त्यांची एकूण किंमत १ लाख ५६ हजार ५८५ रुपये असल्याची माहिती सहाय्यक पोलीस निरीक्षक कुलदीप संकपाळ यांनी प्रसिद्धी पत्रकाद्वारे दिली.

यामध्ये खांडज (ता. बारामती) येथील विक्रम अरविंद चांदगुडे यांचा ४० हजार रुपये किमतीचा सॅमसंग एस २१ एफई मोबाईल, शेळगाव (ता. इंदापूर) येथील यशवंत विक्रम मिंड यांचा ३२ हजार ९९८ रुपये किमतीचा वन प्लस नॉर्ड ४ मोबाईल, शिरवली (ता. बारामती) येथील दत्तात्रय चंद्रकांत आडके यांचा २४ हजार ९९९ रुपये किमतीचा विवो वाय ४०० प्रो ५जी मोबाईल, सांगवी (ता. बारामती) येथील सनी पोपट मदने यांचा २१ हजार ९९९ रुपये किमतीचा ओप्पो एफ २१ एस प्रो मोबाईल, कल्याणी अजित झोरे यांचा १४ हजार ६०० रुपये किमतीचा विवो टी २ ५जी मोबाईल, पणदरे (ता. बारामती) येथील नितीन रावसो जगताप यांचा १३ हजार ९९९ रुपये किमतीचा विवो वाय २९ मोबाईल आणि शिरवली (ता. बारामती) येथील अनिल भानुदास हगारे यांचा ७ हजार ९९० रुपये किमतीचा विवो वाय ९१ मोबाईलचा समावेश आहे.