दौंड तालुक्यातील खुटबाव येथे २०२० मध्ये घडलेल्या दुहेरी हत्याकांड प्रकरणी बारामती येथील जिल्हा व सत्र न्यायालयाने आरोपीला जन्मठेपेची शिक्षा सुनावत महत्त्वपूर्ण निकाल दिला आहे. जिल्हा व सत्र न्यायाधीश व्ही. सी. बर्डे यांनी आरोपी प्रमोद उर्फ पप्पू पवार (रा. सदगुरू कॉलनी, वेणुनगर, वाकड रोड, ता. हवेली, जि. पुणे) याला भारतीय न्याय संहितेतील (तत्कालीन भा.दं.वि.) कलम ३०२ अंतर्गत जन्मठेप (सश्रम कारावास) व पाच हजार रुपये दंडाची शिक्षा सुनावली. दंड न भरल्यास सहा महिन्यांच्या साध्या कारावासाची अतिरिक्त शिक्षा ठोठावण्यात आली आहे. तसेच कलम १७६ व १७७ अन्वये प्रत्येकी सहा महिन्यांच्या साध्या कारावासाची शिक्षाही सुनावण्यात आली.

या प्रकरणातील घटनाक्रम ३० जुलै २०२० रोजी घडला होता. आरोपीने अनैतिक संबंधांच्या संशयातून मनीषा जाधव आणि गुलचंद निकम यांच्यावर लाकडी काठी व लोखंडी कोयत्याने प्राणघातक हल्ला करून त्यांची निर्घृण हत्या केली होती. त्यानंतर स्वतःची खरी ओळख लपवून पोलिसांना खोटे नाव सांगून दिशाभूल करण्याचाही प्रयत्न केला होता.

या घटनेप्रकरणी फिर्यादी पोपट बाबूराव कांबळे यांनी ३१ जुलै २०२० रोजी यवत पोलीस ठाण्यात गुन्हा दाखल केला होता. तपास पूर्ण झाल्यानंतर आरोपीविरुद्ध न्यायालयात दोषारोपपत्र दाखल करण्यात आले.

सरकार पक्षातर्फे विशेष सरकारी वकील ॲड. सुनील वसेकर यांनी प्रभावीपणे बाजू मांडत एकूण १२ साक्षीदार तपासले. यामध्ये प्रत्यक्षदर्शी साक्षीदार बालाबाई देविदास जाधव यांची साक्ष अत्यंत महत्त्वाची ठरली. तसेच तपासी अधिकारी यांच्या साक्षीसह फिर्यादी व इतर साक्षीदारांचे जबाब आणि सरकारी पक्षाचा युक्तिवाद ग्राह्य धरत न्यायालयाने आरोपी दोषी असल्याचे सिद्ध मानले.

या प्रकरणाचा तपास यवत पोलीस ठाण्याच्या मार्गदर्शनाखाली करण्यात आला. पोलीस निरीक्षक संतोष तासगांवकर यांच्या मार्गदर्शनाखाली पोलीस अधिकारी सागर माने यांनी केस अधिकारी म्हणून काम पाहिले, तर पोलीस नाईक वेणूनाद ढोपरे यांनी तपासात मोलाचे सहकार्य केले. न्यायालयीन कामकाजात कोर्ट पैरवी अधिकारी गोरख कसपटे तसेच सहायक फौजदार ए. जी. कवडे यांनीही महत्त्वाची भूमिका बजावली.

सहा वर्षांपूर्वी घडलेल्या या दुहेरी हत्याकांडात न्यायालयाने दिलेल्या जन्मठेपेच्या शिक्षेमुळे गंभीर स्वरूपाच्या गुन्ह्यांमध्ये कठोर शिक्षा होण्याचा महत्त्वपूर्ण संदेश समाजात गेला आहे.