पुणे जिल्हा परिषदेच्या आरोग्य व बांधकाम समितीचे माजी सभापती, सोनाई उद्योग समूहाचे संचालक तथा भाजपाचे युवा नेते प्रवीण माने यांच्या वाढदिवसानिमित्त प्रविणभैय्या माने मित्रपरिवाराच्या वतीने विविध सामाजिक, शैक्षणिक आणि पर्यावरणपूरक उपक्रमांचे आयोजन करण्यात आले. वाढदिवसाचा आनंद समाजोपयोगी कार्यातून साजरा करत त्यांनी सामाजिक बांधिलकीचा आदर्श निर्माण केला.

वाढदिवसानिमित्त प्रवीण माने यांची शैक्षणिक साहित्याने तुला करण्यात आली. यावेळी त्यांनी नागरिकांना पुष्पगुच्छ, हार-तुरे किंवा भेटवस्तू न आणण्याचे आवाहन केले होते. त्यांच्या या आवाहनाला प्रतिसाद देत नागरिक, कार्यकर्ते, मित्रपरिवार व हितचिंतकांनी वह्या, पुस्तके, पेन, पेन्सिल, दप्तर व इतर शालेय साहित्य भेट म्हणून आणले. संकलित करण्यात आलेले हे साहित्य इंदापूर तालुक्यातील गरजू व होतकरू विद्यार्थ्यांना वितरित करण्यात येणार आहे.

शिक्षणाला प्रोत्साहन देण्याच्या उद्देशाने रयत शिक्षण संस्थेच्या कस्तुराबाई कदम विद्यालयात विशेष कार्यक्रमाचे आयोजन करण्यात आले. यावेळी प्रवीण माने यांच्या हस्ते विद्यालय परिसरात वृक्षारोपण करण्यात आले. पर्यावरण संवर्धनाचा संदेश देत विद्यार्थ्यांमध्ये वृक्षप्रेम निर्माण करण्याचा प्रयत्न करण्यात आला.

यावेळी विद्यालयातील प्रत्येक वर्गातील गुणवंत विद्यार्थ्यांचा सन्मान करण्यात आला. विद्यार्थ्यांच्या शैक्षणिक यशाचे कौतुक करत त्यांना पुढील वाटचालीसाठी प्रोत्साहन देण्यात आले. तसेच होतकरू विद्यार्थ्यांना शालेय उपयोगी साहित्याचे वाटप करण्यात आले.

गरजू विद्यार्थ्यांच्या शिक्षणात आर्थिक अडचणी येऊ नयेत यासाठी प्रवीण माने यांनी विशेष पुढाकार घेत विद्यालयातील आर्थिकदृष्ट्या दुर्बल विद्यार्थ्यांच्या संगणक शिक्षण शुल्क तसेच शालांत परीक्षा शुल्कासाठी आर्थिक मदत जाहीर केली. यासंदर्भातील धनादेश त्यांच्या हस्ते विद्यालयाचे मुख्याध्यापक शिनगारे सर यांच्याकडे सुपूर्द करण्यात आला.

उपस्थित मान्यवरांनी प्रवीण माने यांच्या सामाजिक कार्याचे कौतुक करताना, वैयक्तिक आनंदाचा दिवस समाजोपयोगी उपक्रमांसाठी समर्पित करणे ही प्रेरणादायी बाब असल्याचे मत व्यक्त केले. शिक्षण, पर्यावरण आणि सामाजिक बांधिलकी यांचा सुंदर संगम या कार्यक्रमातून पाहायला मिळाला.

हा उपक्रम प्रविणभैय्या माने मित्रपरिवाराच्या वतीने विशाल रणवरे, रविराज चव्हाण, निलेश जाधव, साधु नरुटे, माधव फलफले आणि प्रविण निगडे यांच्या माध्यमातून राबविण्यात आला.

यापुढेही प्रवीण माने यांच्या वाढदिवसानिमित्त तालुक्यातील विविध शाळांमध्ये विद्यार्थ्यांना शैक्षणिक साहित्य वाटप व सामाजिक उपक्रम राबविण्यात येणार असल्याचे सांगण्यात आले.

शिक्षणाला बळ देणारा, पर्यावरण संवर्धनाचा संदेश देणारा आणि गरजू विद्यार्थ्यांच्या पाठीशी उभा राहणारा हा वाढदिवस इंदापूर तालुक्यात कौतुकाचा विषय ठरला आहे.