महाराष्ट्र राज्याचे दिवंगत उपमुख्यमंत्री अजितदादा पवार यांनी बारामती तालुक्यासह ग्रामीण भागाच्या विकासासाठी दिलेल्या मोठ्या योगदानाच्या स्मरणार्थ पिंपळी ग्रामपंचायतीच्या ग्रामसचिवालयास ‘लोकनेते अजितदादा पवार ग्रामसचिवालय’ असे नाव देण्यात यावे, अशी मागणी पिंपळी ग्रामपंचायतीच्या मा. उपसरपंच अश्विनी सुनील बनसोडे यांनी केली आहे. यासंदर्भातील निवेदन जिल्हा परिषद सदस्या शुभांगी कचेर शिंदे, पंचायत समिती सदस्या शुभांगी सुनिल आगवणे यांच्या हस्ते पिंपळी गावच्या सरपंच स्वाती ढवाण व ग्रामविकास अधिकारी बाळासाहेब भोईटे यांच्याकडे देण्यात आले.

दिवंगत अजितदादा पवार यांचे २८ जानेवारी रोजी बारामती येथे झालेल्या विमान अपघातात दुर्दैवी निधन झाले. आपल्या राजकीय कारकिर्दीत त्यांनी भवानीनगर येथील छत्रपती सहकारी साखर कारखानाच्या संचालक पदापासून सुरुवात करत पुणे जिल्हा मध्यवर्ती सहकारी बँकेचे संचालक व चेअरमन, बारामतीचे खासदार-आमदार तसेच राज्याचे सहा वेळा उपमुख्यमंत्री अशी महत्त्वाची पदे भूषवली. जलसंपदा, वित्त, ऊर्जा यांसारखी महत्त्वाची मंत्रालये सांभाळत त्यांनी राज्याच्या तसेच शेतकरी वर्गाच्या विकासासाठी मोठे योगदान दिले.

बारामती तालुका विकासाच्या बाबतीत आदर्श ठरावा यासाठी त्यांनी हजारो कोटींची कामे केली. त्यामुळेच त्यांना ‘विकासपुरुष’ म्हणून ओळख मिळाली. ग्रामीण भागातील विकासकामांमध्येही त्यांनी विशेष लक्ष दिले. पिंपळी-लिमटेक गावासाठी स्वच्छ पिण्याच्या पाण्यासाठी तब्बल २१ कोटी रुपयांचा पाणी फिल्टर प्रकल्प, तसेच बारामतीच्या जिरायती भागातील तेरा गावांचा पाणीप्रश्न सोडवणारा जैनकवाडी बहुउद्देशीय पाणी साठवण तलाव उभारण्याचे महत्त्वाचे काम त्यांनी केले.

याशिवाय पिंपळी गावात ग्रामपंचायतीची भव्य ग्रामसचिवालय इमारत, अंतर्गत रस्ते, बंदिस्त ड्रेनेज, शाळा, मंदिरे, समाजमंदिरे, वाचनालय, व्यायामशाळा, विरंगुळा केंद्र, आरोग्य व पशुवैद्यकीय दवाखाना अशा विविध विकासकामांसाठी सुमारे ३० ते ३५ कोटी रुपयांचा निधी उपलब्ध करून देत गावाच्या सर्वांगीण विकासात मोलाचा वाटा उचलला. या पार्श्वभूमीवर त्यांच्या योगदानाच्या स्मरणार्थ ग्रामसचिवालयास त्यांचे नाव देण्याची मागणी करण्यात आली आहे.

यावेळी जिल्हा परिषद सदस्या शुभांगी शिंदे, पंचायत समिती सदस्या शुभांगी आगवणे, महाराष्ट्र प्रदेश सोशल मीडियाचे उपाध्यक्ष सुनील बनसोडे, मा. सरपंच मंगल केसकर, छत्रपती कारखान्याचे संचालक सतीश देवकाते, संतोष ढवाण, उपसरपंच अजित थोरात, मा. उपसरपंच आबासाहेब देवकाते, मा. उपसरपंच अश्विनी बनसोडे, मा. उपसरपंच राहुल बनकर, ग्रामपंचायत सदस्य वैभव पवार, उमेश पिसाळ, सदस्या कोमल टेंबरे, मीनाक्षी देवकाते, निर्मला यादव, मा. सरपंच राजेंद्र केसकर, पिंपळी विकास सोसायटीचे मा. चेअरमन अशोक देवकाते, दादासो केसकर, सामाजिक कार्यकर्ते अशोक ढवाण, नानासाहेब मदने, हरिभाऊ केसकर, बापूराव केसकर, दत्तात्रय तांबे, आकाश बनकर, जनार्धन बोराटे, रवींद्र धोत्रे यांच्यासह ग्रामस्थ मोठ्या संख्येने उपस्थित होते.