विद्या प्रतिष्ठानचे कला, विज्ञान व वाणिज्य महाविद्यालय, बारामती येथील अन्नतंत्रज्ञान विभाग, सकाळ SIILC, करिअर कट्टा आणि इनोव्हेशन कौन्सिल (IIC) यांच्या संयुक्त विद्यमाने १६ ते २६ फेब्रुवारी २०२६ या कालावधीत ९ दिवसीय “अन्न प्रक्रिया उद्योजकता प्रशिक्षण (On Job Training)” कार्यक्रम उत्साहात पार पडला. या उपक्रमात तब्बल ८५ विद्यार्थ्यांनी सक्रिय सहभाग नोंदवत उद्योगसिद्धतेकडे महत्त्वाचे पाऊल टाकले.

प्रशिक्षण कार्यक्रमाचे उद्घाटन महाराष्ट्र माहिती तंत्रज्ञान सहाय्यता केंद्राचे अध्यक्ष यशवंत शितोळे, कोणार्क हिट सिस्टमचे संचालक बाळासाहेब धुलगुडे व आनंदा पाटील यांच्या प्रमुख उपस्थितीत झाले. कार्यक्रमाच्या अध्यक्षस्थानी महाविद्यालयाचे प्राचार्य डॉ. भरत शिंदे होते. यावेळी उपप्राचार्य डॉ. लालासाहेब काशिद, डॉ. संजय खिलारे, डॉ. सुनील ओगले तसेच विभागप्रमुख प्रा. सुजाता पाटील उपस्थित होते.

प्रशिक्षणासाठी मार्गदर्शक म्हणून कापिला फूडच्या सीईओ व उद्योगकता विकास उत्कृष्टता पुरस्कारप्राप्त गंधाली दिंडे यांनी विद्यार्थ्यांना अन्न प्रक्रिया उद्योगातील संधी, आव्हाने आणि यशस्वी व्यवसाय उभारणीचे बारकावे सविस्तर समजावून सांगितले. १०० हून अधिक स्टार्टअप्सना मार्गदर्शन केलेल्या त्यांच्या अनुभवाचा विद्यार्थ्यांना थेट लाभ झाला.

प्रोफेशनल बेकरी सत्रात मिलेट व ट्रेडिंग कुकीज, ब्रेड, बिस्किटे, खारी, टोस्ट यांसारखी उत्पादने व्यावसायिक दर्जानुसार तयार करण्याचे मार्गदर्शन करण्यात आले. समारोप सत्रात अक्षय घोरपडे यांनी स्टार्टअप व बिझनेस मॅनेजमेंट, क्लाउड किचन संकल्पना, हॉटेल व फूड बिझनेस मॉडेल, ब्रँडिंग आणि डिजिटल प्रमोशन (Canva) यांवर मार्गदर्शन केले.

संपूर्ण कार्यक्रमाचे नियोजन विभागप्रमुख प्रा. सुजाता पाटील, SIILC चे वरिष्ठ व्यवस्थापक अमित मांजरे तसेच अन्नतंत्रज्ञान विभागातील प्रा. दीपाली मोहिते, प्रा. अंजनी घाडगे, प्रा. प्रतीक्षा केंजळे आणि प्रा. प्रतीक्षा घाग यांच्या सहकार्याने यशस्वीरीत्या पार पडले.

या उपक्रमामुळे विद्यार्थ्यांमध्ये स्वरोजगार व स्टार्टअप उभारणीचा आत्मविश्वास निर्माण झाला असून भविष्यात सक्षम अन्न उद्योजक घडविण्याच्या दिशेने हे महत्त्वाचे पाऊल ठरले आहे. अशा उपक्रमांना विद्यार्थ्यांचा १०० टक्के प्रतिसाद लाभतो, हेच या प्रशिक्षणाचे वैशिष्ट्य असल्याचे प्रतिपादन प्राचार्य डॉ. भरत शिंदे यांनी केले.