“सूक्ष्मजीवशास्त्र हे केवळ सूक्ष्मदर्शक, प्रयोगशाळा आणि संशोधनापुरते मर्यादित विज्ञान नाही; मानवी जीवनाच्या प्रत्येक क्षेत्राला स्पर्श करणारे ते एक व्यापक आणि संधींनी भरलेले शास्त्र आहे. विद्यार्थ्यांनी नोकरीच्या मागे धावण्यापेक्षा आपल्या ज्ञानाचे कौशल्यात आणि कौशल्याचे उद्योगात रूपांतर करून स्वतः रोजगारनिर्माते झाले पाहिजे,” असे प्रतिपादन Microbiologists Society of India (MBSI) चे अध्यक्ष डॉ. अरविंद एम. देशमुख यांनी केले.

विद्या प्रतिष्ठानचे कला, विज्ञान व वाणिज्य महाविद्यालय, बारामती येथील सूक्ष्मजीवशास्त्र विभाग आणि Microbiologists Society of India (MBSI) यांच्या संयुक्त विद्यमाने MBSI विद्यार्थी शाखेचे उद्घाटन तसेच ‘Career Opportunities in Microbiology’ या विषयावर विशेष व्याख्यानाचे आयोजन करण्यात आले. महात्मा सभागृहात झालेल्या या कार्यक्रमाला सूक्ष्मजीवशास्त्र विभागातील विद्यार्थी, शिक्षक आणि मान्यवरांची उत्स्फूर्त उपस्थिती होती.

डॉ. देशमुख यांनी विद्यार्थ्यांना मार्गदर्शन करताना सूक्ष्मजीवशास्त्रातील करिअरच्या बदलत्या संधींचा विस्तृत पट उलगडून दाखविला. आरोग्य व क्लिनिकल मायक्रोबायोलॉजी, औषधनिर्मिती, अन्नप्रक्रिया, कृषी, पर्यावरण, जैवतंत्रज्ञान, गुणवत्ता नियंत्रण, संशोधन, औद्योगिक सूक्ष्मजीवशास्त्र तसेच उद्योजकता अशा विविध क्षेत्रांमध्ये मायक्रोबायोलॉजीच्या विद्यार्थ्यांसाठी मोठ्या संधी उपलब्ध असल्याचे त्यांनी स्पष्ट केले. “ज्या क्षेत्रात सूक्ष्मजीव आहेत, त्या क्षेत्रात मायक्रोबायोलॉजीची संधी आहे,” या विचारातून विद्यार्थ्यांनी आपल्या विषयाकडे व्यापक दृष्टीने पाहावे, असे आवाहन त्यांनी केले.

महाविद्यालयाचे प्राचार्य डॉ. भारत शिंदे यांनी आपल्या मनोगतात विद्या प्रतिष्ठान महाविद्यालयाची शैक्षणिक, संशोधनात्मक व बहुआयामी वाटचाल अधोरेखित केली. विद्यार्थ्यांच्या सर्वांगीण विकासासाठी अभ्यासक्रमातील ज्ञानासोबतच संशोधनवृत्ती, नवोपक्रम, कौशल्यविकास, नेतृत्वगुण आणि उद्योगाभिमुख दृष्टिकोन विकसित करण्यावर संस्थेचा भर असल्याचे त्यांनी नमूद केले.

महाविद्यालयाच्या उपप्राचार्या, IQAC समन्वयक व सूक्ष्मजीवशास्त्र विभागप्रमुख प्रा. निलिमा पेंढारकर यांनी MBSI विद्यार्थी शाखेचे महत्त्व स्पष्ट केले. “विद्यार्थ्यांना विषयातील अद्ययावत ज्ञानासोबतच तज्ज्ञांशी संवाद, संशोधनाच्या संधी, करिअर मार्गदर्शन आणि व्यावसायिक क्षेत्राशी जोडणारे व्यासपीठ मिळणे ही आजची गरज आहे,” असे त्यांनी सांगितले. MBSIच्या माध्यमातून विद्यार्थ्यांच्या वैज्ञानिक दृष्टिकोनाला, कौशल्यांना आणि आत्मविश्वासाला नवी दिशा मिळेल, असा विश्वास त्यांनी व्यक्त केला.

कार्यक्रमाचे स्वागत प्रा. निलिमा पेंढारकर यांनी केले. MBSI समन्वयक प्रा. निलिमा देवी यांनी विद्यार्थी शाखेच्या उद्दिष्टांची माहिती दिली. प्रा. योगिता चौधरी यांनी प्रमुख पाहुण्यांचा परिचय करून दिला. टी.वाय.बी.एस्सी.चे विद्यार्थी विराज साळुंखे यांनी MBSI विद्यार्थी शाखेची माहिती सादर केली, तर सिद्धी चांदगुडे हिने MBSIतर्फे विद्यार्थ्यांना दिल्या जाणाऱ्या विविध पुरस्कार व सन्मानांची माहिती दिली.

◆ ज्ञान, कौशल्य आणि संधी यांचा संगम

कार्यक्रमात MBSI विद्यार्थी शाखेची उद्दिष्टे, कार्यपद्धती आणि विद्यार्थ्यांसाठी राबविण्यात येणाऱ्या विविध उपक्रमांची माहिती देण्यात आली. करिअर मार्गदर्शन, शैक्षणिक उपक्रम, संशोधनविषयक संवाद, तज्ज्ञ व्याख्याने, वैज्ञानिक उपक्रम, विद्यार्थी सहभाग तसेच पुरस्कार व सन्मान यांच्या माध्यमातून विद्यार्थ्यांच्या गुणवत्तेला व्यासपीठ उपलब्ध करून देण्याचा या शाखेचा उद्देश आहे.

◆‘मायक्रोबायोलॉजी’पासून ‘मायक्रो-एंटरप्राइज’कडे!

MBSI विद्यार्थी शाखेच्या माध्यमातून विद्यार्थ्यांना शिक्षणापासून संशोधनापर्यंत, प्रयोगशाळेपासून उद्योगापर्यंत आणि कौशल्यापासून उद्योजकतेपर्यंत विविध संधींची दारे खुली होणार आहेत. त्यामुळे ही विद्यार्थी शाखा केवळ एक शैक्षणिक उपक्रम न राहता विद्यार्थ्यांच्या करिअरला दिशा देणारे, वैज्ञानिक दृष्टिकोन घडविणारे आणि भविष्यातील रोजगारनिर्माते घडविणारे प्रभावी व्यासपीठ ठरणार आहे.