वाढत्या सायबर गुन्ह्यांच्या पार्श्वभूमीवर विद्यार्थ्यांमध्ये सायबर सुरक्षिततेबाबत जनजागृती निर्माण करण्यासाठी विद्या प्रतिष्ठानच्या कला, विज्ञान व वाणिज्य महाविद्यालय, बारामती येथे क्विक हील फाउंडेशनच्या सहकार्याने 'सायबर शिक्षा फॉर सायबर सुरक्षा' क्लबची स्थापना करण्यात आली. या क्लबच्या माध्यमातून शाळा, महाविद्यालये व समाजामध्ये कार्यशाळा, व्याख्याने, जनजागृती मोहिमा आणि डिजिटल सुरक्षा अभियान राबविण्यात येणार आहेत.

कार्यक्रमाच्या प्रारंभी समन्वयक अक्षय भोसले यांनी क्लबची उद्दिष्टे स्पष्ट करत विद्यार्थ्यांनी सायबर वॉरियर्स म्हणून समाजात सायबर सुरक्षिततेचा संदेश पोहोचविण्याचे आवाहन केले. विभागप्रमुख डॉ. जगदीश सांगवीकर यांनी सायबर जनजागृती ही प्रत्येक सुजाण नागरिकाची जबाबदारी असल्याचे सांगत युवकांनी समाजाला योग्य दिशा देण्याची गरज अधोरेखित केली.

प्राचार्य डॉ. भरत शिंदे यांच्या हस्ते क्लबचे उद्घाटन करण्यात आले. अध्यक्षीय भाषणात त्यांनी महाविद्यालयाच्या सायबर जनजागृती क्षेत्रातील कार्याचा आढावा घेत प्रत्येक विद्यार्थ्याने किमान १५०० नागरिकांना सायबर सुरक्षिततेबाबत मार्गदर्शन करण्याचे वैयक्तिक ध्येय निश्चित करावे, असे आवाहन केले. उपप्राचार्य व आयक्यूएसी समन्वयक निलिमा पेंढारकर यांनी अशा उपक्रमांमुळे विद्यार्थ्यांमध्ये नेतृत्वगुण, सामाजिक बांधिलकी व व्यक्तिमत्त्व विकासाला चालना मिळत असल्याचे सांगितले. उपप्राचार्य डॉ. भीमराव मोरे यांनी डिजिटल माध्यमांचा जबाबदारीने वापर करण्याचे महत्त्व स्पष्ट केले.

यावेळी निवडक विद्यार्थ्यांची सायबर वॉरियर्स म्हणून घोषणा करण्यात आली असून प्राचार्य डॉ. भरत शिंदे यांच्या हस्ते त्यांना अधिकृत ओळखपत्र व बॅज प्रदान करण्यात आले. कार्यक्रमास प्राध्यापक, विद्यार्थी व विविध विभागांचे प्रतिनिधी मोठ्या संख्येने उपस्थित होते. कार्यक्रमाचे सूत्रसंचालन व समारोप आभारप्रदर्शन विशाल शिंदे यांनी केले.