५९ कालव्यावर अवलंबून असलेल्या शेतकऱ्यांसमोर सध्या जनावरांच्या चाऱ्याचा आणि पिण्याच्या पाण्याचा गंभीर प्रश्न निर्माण झाला आहे. जनावरांचा चारा पाण्याअभावी सुकण्याच्या मार्गावर असून, पिण्याच्या पाण्याचे स्रोतही धोक्यात आले आहेत. या पार्श्वभूमीवर ५९ कालव्याला तातडीने एक आवर्तन देण्यात यावे, अशी आर्त मागणी कालव्यावर अवलंबून असलेल्या गरजू शेतकऱ्यांनी केली आहे. याबाबतचे निवेदन शुक्रवारी (दि. ९ ऑक्टोबर) इंदापूरचे तहसीलदार यांना देण्यात आले.

५९ कालव्याला एकदा पाणी सोडल्यास शेतकऱ्यांना पुढील दोन ते तीन महिने पुरेल एवढा जनावरांचा चारा उपलब्ध होऊ शकतो. त्याचबरोबर परिसरातील पिण्याच्या पाण्याचे स्रोतही कार्यरत राहण्यास मदत होईल. त्यामुळे शेतकरी आणि त्यांच्या जनावरांच्या पाण्याचा प्रश्न काही प्रमाणात सुटू शकतो, असे निवेदनात नमूद करण्यात आले आहे.

सध्या पाण्याअभावी जनावरांच्या चाऱ्याची परिस्थिती बिकट होत चालली आहे. वेळेत पाणी मिळाले नाही, तर येत्या महिन्याभरात जनावरांच्या चाऱ्यासाठी शासनाकडे मदतीची मागणी करण्याची वेळ शेतकऱ्यांवर येऊ शकते. त्यामुळे कालव्याला आवर्तन दिल्यास शेतकऱ्यांना दिलासा मिळण्यासोबतच शासनावरील संभाव्य आर्थिक भारही कमी होऊ शकतो, अशी भूमिका शेतकऱ्यांनी मांडली आहे. प्रशासनाने शेतकऱ्यांच्या परिस्थितीचा सहानुभूतीपूर्वक विचार करावा, अशी विनंती केली आहे.

“आम्ही आपणास मायबाप समजून पाण्याची मागणी करीत आहोत. ५९ कालव्याला पाणी मिळाल्यास आम्हाला आमची आणि आमच्या जनावरांची काळजी घेता येईल. त्यामुळे शेटफळ तलावातील पाण्याचा ठरलेला कार्यकाळ पूर्ण करून ५९ कालव्याला तातडीने एक आवर्तन द्यावे,” अशी आर्त विनंती शेतकऱ्यांनी निवेदनातून केली आहे.

● प्रशासनाच्या निर्णयाकडे शेतकऱ्यांचे लक्ष ●

५९ कालव्यावरील शेतकरी आणि त्यांच्या जनावरांच्या जीवन-मरणाचा प्रश्न लक्षात घेऊन प्रशासनाने तातडीने निर्णय घ्यावा, अशी अपेक्षा शेतकऱ्यांनी व्यक्त केली आहे. शेटफळ तलावातील पाण्याचा नियोजित कार्यकाळ पूर्ण झाल्यानंतर ५९ कालव्याला आवर्तन मिळणार का आणि त्यातून शेतकऱ्यांना दिलासा मिळणार का, याकडे आता परिसरातील शेतकऱ्यांचे लक्ष लागले आहे.