राज्याचे लोकप्रिय नेते व माजी उपमुख्यमंत्री अजित पवार यांच्या विमान अपघाताबाबत राज्यभरात पसरलेल्या चर्चांदरम्यान, मुंबई विमानतळावरील सीसीटीव्ही फुटेज नाकारण्यात आल्याने संशय आणखी गडद झाला आहे. सोमेश्वरनगर (ता. बारामती) येथील नितीन संजय यादव यांनी या प्रकरणी केंद्र सरकारच्या नागरी विमान वाहतूक व सुरक्षेशी संबंधित विभागांकडे माहिती अधिकारांतर्गत (RTI) मागणी करूनही अपेक्षित फुटेज न मिळाल्याचा आरोप केला आहे.

यादव यांनी 28 जानेवारी 2026 रोजी पहाटे 6 ते सकाळी 9 या कालावधीत मुंबई विमानतळावरील सीसीटीव्ही फुटेज हे 10 फेब्रुवारीला माहिती अर्ज करून मागविले होते. मात्र अनेक वेळा पाठपुरावा करूनही केंद्रीय नागरी सुरक्षा/विमान वाहतूक विभागाने ही माहिती देण्यास नकार दिल्याचे त्यांनी सांगितले. या निर्णयामुळे “खरोखरच काही दडपले जात आहे का?” असा गंभीर प्रश्न निर्माण होत असल्याचे यादव यांचे म्हणणे आहे.

या नकाराविरोधात यादव यांनी अपील दाखल करताना सर्वोच्च न्यायालय तसेच केंद्रीय माहिती आयुक्तांच्या न्यायनिर्णयांचा संदर्भ दिला आहे. यासोबतच, त्यांनी मुंबई पोलीस आयुक्तांकडेही माहिती अधिकारांतर्गत स्वतंत्र अर्ज सादर करून देवगिरी शासकीय निवासस्थान ते मंत्रालय या मार्गावरील वाहतूक पोलिसांकडे उपलब्ध असलेले, त्याच दिवशीचे (पहाटे 6 ते 9) सीसीटीव्ही फुटेज मागितले आहे.

यादव यांचा युक्तिवाद असा आहे की, अजित पवार हे संवैधानिक पदावर कार्यरत लोकप्रतिनिधी व शासकीय जनसेवक असल्याने, सार्वजनिक हिताच्या दृष्टीने त्या दिवसाचे सीसीटीव्ही फुटेज तात्काळ उपलब्ध करून देणे आवश्यक आहे. विमानतळावरील फुटेज नाकारण्याचा निर्णय धक्कादायक असून तो पारदर्शकतेच्या विरोधात असल्याचा आरोप त्यांनी केला आहे.

दरम्यान, या प्रकरणावर केंद्र व राज्य संबंधित यंत्रणांकडून अधिकृत भूमिका स्पष्ट होणे अपेक्षित असून, सीसीटीव्ही फुटेज उपलब्ध होणार की नाही, याकडे राज्यभराचे लक्ष लागले आहे.