आध्यात्मिक श्रद्धा, सामाजिक बांधिलकी आणि लोककल्याणाचा संवेदनशील दृष्टिकोन यांचा सुरेख संगम शनिवारी शहाजीनगर येथील श्री दत्त देवस्थान येथे अनुभवास आला. राज्याचे कृषिमंत्री दत्तात्रेय भरणे यांच्या पत्नी सारिकाताई भरणे यांनी शनिवारी (दि.२७) श्री दत्त देवस्थानला सदिच्छा भेट देत श्री दत्तचरणी भक्तिभावाने दर्शन घेतले.

या प्रसंगी दत्तभक्त परिवाराच्या वतीने देवस्थानचे प्रमुख नीलकंठ मोहिते व तानाजी गायकवाड यांनी सारिकाताई भरणे यांचे पारंपरिक पद्धतीने स्वागत केले. देवदर्शनानंतर त्यांनी मंदिर परिसराची पाहणी केली. तसेच देवस्थानमार्फत वर्षभर राबविण्यात येणारे धार्मिक, सामाजिक व अध्यात्मिक उपक्रम, अखंड अन्नदान सेवा आणि विविध समाजोपयोगी उपक्रमांची सविस्तर माहिती त्यांनी जाणून घेतली.

यावेळी बोलताना सारिकाताई भरणे म्हणाल्या की, “श्री दत्त देवस्थान हे केवळ धार्मिक स्थळ नसून समाजसंस्कारांचे प्रेरणास्थान आहे. या देवस्थानामुळे काटी–शहाजीनगर परिसरात आध्यात्मिक चैतन्य निर्माण झाले असून, भक्ती आणि श्रद्धेची ही जोडच आपली संस्कृती व संस्कार टिकवून ठेवते.” समाजातील प्रत्येक घटकापर्यंत सेवा, संस्कार आणि श्रद्धेचा संदेश पोहोचवणारे देवस्थानचे कार्य आदर्शवत असून, असे उपक्रम समाजाला योग्य दिशा देणारे असल्याचे त्यांनी नमूद केले.

देवस्थानमार्फत पौर्णिमा कालावधीत सुरू असलेल्या अखंड अन्नदान सेवेचे त्यांनी विशेष कौतुक केले. “भुकेल्याला अन्न देणे हीच खरी मानवसेवा असून, अशा सेवेमुळे समाजात माणुसकी, समता आणि सहभावना अधिक बळकट होते,” असे गौरवोद्गार त्यांनी काढले.

● अध्यात्मिक मूल्यांतून सक्षम नेतृत्व ●