पुणे जिल्हा मध्यवर्ती सहकारी बँक, पुणे व राष्ट्रीय कृषी व ग्रामीण विकास बँक (नाबार्ड) यांच्या संयुक्त विद्यमाने बारामती तालुका व शहरात आर्थिक साक्षरता अभियान राबविण्यात येत असून या अभियानातून शेतकरी, महिला बचत गट, युवा उद्योजक व विद्यार्थ्यांना विविध कर्ज व शासकीय योजनांबाबत सविस्तर मार्गदर्शन करण्यात येत आहे.

पुणे जिल्हा मध्यवर्ती सहकारी बँक, बारामती मुख्य शाखेच्या अंतर्गत मुख्य शाखा अधिकारी संदीप जगताप यांच्या मार्गदर्शनाखाली तालुका व शहरातील विविध उपशाखांमार्फत हे अभियान राबविण्यात येत आहे. या अंतर्गत महिला बचत गटांसाठी सामूहिक व वैयक्तिक कर्ज योजना, कर्जावरील ४ टक्के व्याज परतावा, शेतकऱ्यांसाठी झिरो टक्के व्याजदराने तीन लाख रुपयांपर्यंत पीक कर्ज, अल्प व दीर्घ मुदतीची कर्जे तसेच कुक्कुटपालन, शेळीपालन, गायी पालन व मत्स्यपालन यांसारख्या शेतीपूरक व्यवसाय कर्ज योजनांची माहिती देण्यात आली.

याशिवाय आयटीआय, डिग्री, डिप्लोमा, आयटी इंजिनिअर व प्रशिक्षित युवकांसाठी उद्योजक कर्ज योजना, विविध महामंडळांच्या कर्ज व अनुदान योजना, संजय गांधी निराधार योजनेतील पात्र लाभार्थ्यांसाठी २०० रुपयांत बचत खाते, महिला बचत गटांसाठी ५०० रुपयांत बचत खाते, इंटरनेट बँकिंग, बँक अ‍ॅप, फोन पे, गुगल पे, स्कॅनर सुविधा, एटीएम कार्ड, जीवनज्योती विमा व सुरक्षा विमा योजनांची माहिती देण्यात आली.

विद्यार्थ्यांसाठी शैक्षणिक शिष्यवृत्ती, शैक्षणिक कर्ज योजना, मोफत पाठ्यपुस्तके, गणवेश अनुदान, मागासवर्गीय, अल्पसंख्यांक तसेच राजर्षी शाहू महाराज शिष्यवृत्ती योजनांबाबतही सविस्तर मार्गदर्शन करण्यात आले. हे मार्गदर्शन विद्या प्रतिष्ठान कॉलेज, बारामती एमआयडीसी तसेच पिंपळी जळोची, काटेवाडी, गुणवडी मार्केटयार्ड, खांडज, पारवडी, अंजनगाव–देऊळगाव रसाळ व डोर्लेवाडी येथे आर्थिक साक्षरता समन्वयक अश्विनी बनसोडे यांनी केले. यावेळी विमा फॉर्म भरून घेणे व बँक खाती उघडण्याची प्रक्रिया देखील पार पडली.

राज्याचे उपमुख्यमंत्री अजित पवार यांच्या नेतृत्वाखाली पुणे जिल्हा मध्यवर्ती सहकारी बँक राज्यातील आघाडीची व कोट्यवधींची उलाढाल करणारी बँक ठरली असून सहकार क्षेत्रात बँकेचा सर्वांगीण विकास होत असल्याचे प्रतिपादन बँकेचे संचालक संभाजी होळकर यांनी केले. शेतकरी, महिला बचत गट, युवक व उद्योजकांनी बँकेच्या विविध कर्ज योजनांचा लाभ घ्यावा, असे आवाहन त्यांनी केले.

यावेळी मुख्य शाखा व्यवस्थापक संदीप जगताप यांनी शेती व बिगर शेती कर्ज, गृहकर्ज, शैक्षणिक कर्ज, कृषी पर्यटन कर्ज, सौरऊर्जेवर आधारित कृषी पंप कर्ज, सोनेतारण कर्ज, वाहन कर्ज, औद्योगिक व व्यापारी कर्ज तसेच इंटरनेट बँकिंग सुविधांची माहिती देत नागरिकांनी बँकेच्या योजनांचा जास्तीत जास्त लाभ घ्यावा, असे आवाहन केले.