जागतिक हिंदी दिनाचे औचित्य साधून इंदापूर हिंदी अध्यापक संघाच्या वतीने शनिवारी (दि. १० जानेवारी) निमगाव केतकी येथे भव्य गौरव सोहळ्याचे आयोजन करण्यात आले होते. या कार्यक्रमात १४ सप्टेंबर रोजी हिंदी दिनानिमित्त घेण्यात आलेल्या हिंदी निबंध स्पर्धेतील गुणवंत विद्यार्थ्यांचा तसेच उपक्रमशील व आदर्श शिक्षकांचा सन्मान करण्यात आला.

या प्रसंगी माजी आमदार दत्तात्रय सावंत यांनी इंदापूर हिंदी अध्यापक संघाच्या कार्याचे विशेष कौतुक करत, “संघाने केलेले कार्य केवळ इंदापूरपुरते मर्यादित नसून संपूर्ण राज्यासाठी प्रेरणादायी आहे,” असे गौरवोद्गार काढले.

हिंदी निबंध स्पर्धेत प्रत्येक शाळेतून तीन गटांत प्रथम, द्वितीय व तृतीय क्रमांक मिळवलेल्या एकूण नऊ विद्यार्थ्यांना प्रमाणपत्र देऊन गौरविण्यात आले. तसेच प्रत्येक शाळेतील उपक्रमशील शिक्षकांचा फुल, श्रीफल, शाल व ट्रॉफी देऊन सन्मान करण्यात आला. यावेळी १० आदर्श हिंदी शिक्षक व ४५ उपक्रमशील शिक्षकांना पुरस्कार प्रदान करण्यात आले. याशिवाय पाच निवृत्त शिक्षकांचा सेवापूर्तीनिमित्त विशेष सत्कार करण्यात आला.

या कार्यक्रमास मुख्याध्यापक संघाचे अध्यक्ष जे. एन. पाटील सर, सचिव सी. टी. कोकाटे सर, शिरसाट सर, माने सर, छत्रपती शिवाजी हायस्कूल भवानीनगरचे रमेश मचाले सर, उस्मान मुलाणी सर, सुधाकर भोंग सर, राजेंद्र रणमोडे सर, उपाध्यक्ष डी. जे. निंबाळकर सर, कार्याध्यक्ष डी. व्ही. वाघ सर यांच्यासह अनेक मान्यवर उपस्थित होते.

कार्यक्रमास उपस्थित सर्व विद्यार्थ्यांना मनीषा भोसले यांनी अल्पोपहार दिला. कार्यक्रमाचे सूत्रसंचालन वर्षा गाडे यांनी केले. त्यांना शब्बीर मुलाणी, मिनानाथ कोटे सर, संजीव पांढरे सर व शहंशाह मुजावर यांनी सहकार्य केले. कार्यक्रमाचे आभार राजेंद्र रणमोडे यांनी मानले.