● इंदापूर : प्रतिनिधी
केंद्र सरकारने सादर केलेला अर्थसंकल्प महाराष्ट्रासाठी अन्यायकारक असल्याचा दावा करत, 'अर्थसंकल्पात एकच दोष, महाराष्ट्र रोष, महाराष्ट्र रोष' अशा घोषणा करत राष्ट्रवादी काँग्रेस शरदचंद्र पवार पक्षाच्या कार्यकर्त्यांनी गुरुवारी प्रशासकीय भवनासमोर ठिय्या आंदोलन केले. आंदोलनकर्त्यांनी नायब तहसीलदार अभिजीत सोनवणे यांच्याकडे निवेदन सादर केले.

पक्षाचे तालुकाध्यक्ष ॲड. तेजसिंह पाटील, पुणे जिल्हा मध्यवर्ती सहकारी बँकेचे संचालक आप्पासाहेब जगदाळे, कर्मयोगी सहकारी साखर कारखान्याचे उपाध्यक्ष भरत शहा, सामाजिक न्याय विभागाचे जिल्हाध्यक्ष सागर मिसाळ, अशोक घोगरे यांनी आंदोलनाचे नेतृत्व केले. तेजसिंह पाटील या वेळी बोलताना ॲड. तेजसिंह पाटील म्हणाले की, भारताच्या अर्थव्यवस्थेत मोठा वाटा असणाऱ्या महाराष्ट्रातील जनतेने लोकसभा निवडणुकीत महाविकास आघाडीचे ३१ खासदार निवडून दिले. त्याचा राग, द्वेष ठेवून केंद्रातील भाजपप्रणित सरकारने महाराष्ट्राच्या तोंडाला पाने पुसली. महाराष्ट्राच्या तुलनेने महसूल कमी असताना केवळ चंद्राबाबू नायडू व नितीशकुमार यांच्या पाठिंब्यावर केंद्रशासन तरल्याने, आंध्र प्रदेश व बिहारसाठी अर्थसंकल्पात भरीव तरतूद करण्यात आली आहे. केंद्र शासनाच्या या दुटप्पी भूमिकेचा आम्ही तीव्र निषेध करत आहोत.

अर्थसंकल्पात शेतकरी, शेतमजूर, कष्टकरी, कामगार, बेरोजगार, अनुसूचित जाती, अनुसूचित जमाती, भटके विमुक्त यांच्यासाठी कोणतीही भरीव तरतूद करण्यात आली नाही. हा अर्थसंकल्प देशवासियांची निराशा करणारा आहे, असे ही ते म्हणाले.

आप्पासाहेब जगदाळे म्हणाले की, केंद्र सरकारने अर्थसंकल्पाच्या माध्यमातून महाराष्ट्रावर अन्याय केला आहे. शेतकरी, कष्टकरी, महिला, सर्वसामान्य लोक, तरुणांसाठी कोणती ही भरीव तरतूद करण्यात आली नाही. त्यामुळे पक्षाचे प्रदेशाध्यक्ष जयंत पाटील, खा. सुप्रिया सुळे, जिल्हाध्यक्ष जगन्नाथ शेवाळे यांच्या मार्गदर्शनाखाली पक्षाने हे आंदोलन केले आहे.

यावेळी शकीलभाई सय्यद, कांतीलाल झगडे, शहराध्यक्ष  ॲड. इनायतअली काझी, पोपटराव पवार, प्रमोद राऊत, सुनील तळेकर, अशोक चव्हाण, गणेश महाजन, श्रीनिवास शेळके, अमोल मुळे, श्रीकांत मखरे, विकास खिलारे, सिकंदर बागवान, अनिल ढावरे, अजय पारसे, अक्षय सुर्यवंशी, भारत यादव, नारायण वीर, दीपक गुरगुडे, युवराज सरक, छाया पडसळकर, रेश्मा शेख, विजया कोकाटे, तमन्ना शेख, सुनीता नरुटे यांच्यासह असंख्य कार्यकर्ते या आंदोलनात सहभागी झाले होते.