विद्या प्रतिष्ठानचे कला, विज्ञान व वाणिज्य महाविद्यालय, बारामती यांचा सांस्कृतिक संघ क्वालालंपूर (मलेशिया) येथे आयोजित “रिदम अँड एक्स्प्रेशन वर्ल्ड फेस्ट 2025” या आंतरराष्ट्रीय युवक महोत्सवात आपल्या बहारदार कलाकौशल्याने सर्वांचे लक्ष वेधून घेत सुवर्णपदक पटकावण्यात यशस्वी ठरला.

ऑल इंडिया डान्स, ड्रामा, म्युझिक अँड फोकल फेस्टिव्हल व अखिल लोककला सांस्कृतिक संस्था, पुणे यांच्या वतीने  या प्रतिष्ठेच्या आंतरराष्ट्रीय महोत्सवात महाविद्यालयाच्या विद्यार्थ्यांनी सादर केलेल्या ‘पाटी’ या एकांकिकेला सुवर्णपदक मिळाले. त्याचबरोबर विद्यार्थिनी  तृप्ती खैरे हिने लावणी नृत्यप्रकारात रौप्यपदक पटकावले, तर महाविद्यालयाच्या मूकनाट्याला देखील रौप्यपदकाने गौरविण्यात आले. भाषेचा अडसर असूनही प्रेक्षक आणि परीक्षकांनी विद्यार्थ्यांच्या सादरीकरणाला दिलेली दाद ही विशेष दखल घेण्यासारखी ठरली.

गेल्या वर्षभरात महाराष्ट्रभर तब्बल ५० हून अधिक पारितोषिके पटकावलेली ‘पाटी’ एकांकिका आंतरराष्ट्रीय व्यासपीठावरही झळकली. श्रद्धा रंगारी हिने स्त्री अभिनयासाठी, तर सुजल बर्गे याने पुरुष अभिनयासाठी पारितोषिक मिळवत रंगभूमीवर आपली छाप उमटवली. लेखक भावेश आंबडस्कर यांचे प्रभावी लेखन आणि कलात्मक मार्गदर्शक आदेश यादव व सुबोधन जोशी यांचे दिग्दर्शन हे या यशामागील महत्त्वाचे गमक ठरले.

यशस्वी प्रवासात विद्यार्थ्यांना प्राचार्य डॉ. भरत शिंदे यांचे प्रेरणादायी नेतृत्व लाभले. त्यांच्या नेतृत्वाखाली बारामतीचा नावलौकिक राज्य व राष्ट्रीय पातळीपलीकडे जाऊन आंतरराष्ट्रीय व्यासपीठावर पोहोचला आहे. सांस्कृतिक विभाग प्रमुख व संघ व्यवस्थापक डॉ. एच. एस. पाटील, डॉ. भिमराव मोरे, विद्यार्थी विकास अधिकारी डॉ. अमर भोसले, प्रा. विजय काकडे तसेच सांस्कृतिक समितीतील सर्व सदस्यांनी विद्यार्थ्यांना योग्य मार्गदर्शन केले.

या अभूतपूर्व यशाबद्दल विद्या प्रतिष्ठानचे अध्यक्ष शरद पवार, उपमुख्यमंत्री अजित पवार, उपाध्यक्ष अ‍ॅड. अशोक प्रभुणे, सचिव अ‍ॅड. नीलिमा गुजर, खजिनदार युगेंद्र पवार, डॉ. प्रतापराव पवार, विठ्ठल मणियार, खा. सुप्रिया सुळे, खा. सुनेत्रा पवार, डॉ. राजीव शहा, मंदार सिकची, किरण गुजर, कर्नल श्रीष कंबोज यांच्यासह महाविद्यालयाचे प्राध्यापकवर्ग, शिक्षकेतर कर्मचारी व विद्यार्थीमित्रांनी संघाचे मनःपूर्वक अभिनंदन केले आहे.

विद्या प्रतिष्ठानचा सांस्कृतिक झेंडा आता आंतरराष्ट्रीय स्तरावर फडकला असून या ऐतिहासिक कामगिरीमुळे महाविद्यालयाच्या  सांस्कृतिक संघावर सर्वत्र कौतुकाचा व अभिनंदनाचा वर्षाव होत आहे.