एकीकडे पैसे कमावण्यासाठी वाटेल त्या मार्गांचा अवलंब केल्याच्या घटना घडत असतानाच समाजात अजूनही प्रामाणिकपणा कायम असल्याचा प्रत्यय शनिवारी (दि. २६) बारामती बस स्थानकात आला. तुटपुंज्या पगारावर काम करत असतानाही तसूभरही नीतिमत्ता ढासळू न देता चालक वाहकाने सापडलेल्या ३ हजारांची रोख रक्कम ज्याची होती त्याला परत केल्याच्या घटनेने इमाने इतबारे सेवा करणाऱ्या कर्मचाऱ्यांच्या प्रामाणिकपणाचे दर्शन घडले.

याबाबत सविस्तर माहिती अशी की, राज्य परिवहन महामंडळाच्या बारामती आगारातील भिगवण - बारामती या बसने भिगवण येथे प्रवासी सोडून बारामती आगारात बस जमा केल्यानंतर वाहक राजेश पवार यांना एका प्रवाशाने फोन करून बसमध्ये वाहकाच्या पाठीमागील आसनाखाली पैसे पडले असल्याचे सांगितले.

लागलीच क्षणाचाही विलंब न करता तत्परतेने चालक सचिन घनवट आणि वाहक राजेश पवार यांनी बस लावलेल्या ठिकाणी धाव घेतली असता त्यांना आसनाखाली पाहिले ३ हजारांची रोख रक्कम सापडली. चालक आणि वाहकाने ही रक्कम बारामती आगारात जमा करून समाजापुढे प्रामाणिकपणाचे जिवंत उदाहरण उभे केले.

सदर रक्कम खडकी (ता. दौंड) येथील रहिवासी सोमनाथ कांबळे यांची होती. अतिशय हलाखीच्या परिस्थितीतही पोटाला चिमटा घेऊन त्यांनी मुलांच्या शिक्षणासाठी पैसे ठेवले असल्याचे यावेळी समजले. रक्कम परत केल्यानंतर कांबळे यांनी चालक - वाहकाचे आभार मानत त्यांच्या प्रामाणिकपणाचे तोंड भरून कौतुक केले.