राष्ट्रवादी काँग्रेसचे राष्ट्रीय अध्यक्ष अजितदादा पवार यांनी बारामती मतदार संघातून आपला उमेदवारी अर्ज दाखल केला. त्यापूर्वी अजितदादा पवार यांना खा. सुनेत्रा पवार यांनी औक्षण करीत विजयीभव म्हणत विजयाचा कुंकूम तिलक लावला. यावेळी सहयोग सोसायटी समोर हजारो कार्यकर्ते जमा झाले होते.

महामानव डॉ. बाबासाहेब आंबेडकर यांचे स्मारक तसेच कसबा येथील छत्रपती शिवाजी महाराज यांच्या पुतळ्याला वंदन करून भव्य मिरवणुकीने बारामती शहरातील प्रमुख मार्गावरून हजारो कार्यकर्त्यांच्या गराड्यात अजित पवार यांनी प्रशासकीय भवन येथे जाऊन निवडणूक निर्णय अधिकारी वैभव नावडकर यांच्याकडे आपला उमेदवारी अर्ज दाखल केला. यावेळी त्यांच्यासोबत राजकीय व सहकार क्षेत्रातील, औद्योगिक क्षेत्रातील नामवंत पदाधिकारी तसेच माळेगाव सहकारी साखर कारखान्याचे अध्यक्ष ॲड. केशव जगताप, सोमेश्वर सहकारी साखर कारखान्याचे अध्यक्ष पुरुषोत्तम जगताप व माजी नगरसेवक किरण गुजर यांचेसह राष्ट्रवादीचे पदाधिकारी, संचालक मंडळ तसेच मोठ्या संख्येने महिला या मिरवणुकीत सामील झाल्या होत्या.

आपला उमेदवारी अर्ज दाखल केल्यानंतर अजितदादा यांनी आपल्या प्रचाराचा शुभारंभ कन्हेरी येथील श्री मारुतीरायाच्या मुर्तीला नमस्कार व आरती करून जाहिर सभा घेतली. यावेळी जाहीर सभेला बारामती व पंचक्रोशीतील हजारो कार्यकर्ते, विविध क्षेत्रातील पदाधिकारी, नामवंत मंडळी आवर्जुन उपस्थित होती. मिरवणुकीत तसेच अर्ज दाखल करताना अजितदादांचे सुपूत्र पार्थ आणि जय हे दोघेही त्यांच्या सोबतच होते.

तात्यासाहेब पवारांची फॅमिली कष्टातून पुढे आली. वडीलांच्या माघारी आईने कष्ट करून कुटुंब उभे केले. ती कुटुंबाला सांगत होती की माझ्या दादाच्या विरोधात उभे राहू नका. तरीही उमेदवार दिला गेला, मग आता साहेबांनी तात्यासाहेबांचे घर फोडले असे म्हणायचे का? या शब्दात उपमुख्यमंत्री अजित पवार यांनी ज्येष्ठ नेते शरद पवार यांच्यावर घणाघाती हल्ला केला. कुटुंबातील या बाबी सांगताना ते काही क्षण भावनिक झाले. अजित पवार यांच्या प्रचाराची सुरुवात कन्हेरी येथील मारुती मंदिरातून झाली. यावेळी ते बोलत होते.

अजित पवार म्हणाले, लोकसभेला सुप्रिया सुळेविरोधात सुनेत्रा पवार यांना उमेदवारी देणे ही माझी चूक होती. मी मनाचा मोठेपणा दाखवत माझ्याकडून चूक झाल्याचे कबुल केले. मग आता चूक कोणी केली ? आई सांगतेय की माझ्या दादाविरोधात उमेदवार देवू नका. हे जे काही ज्या पद्धतीने चाललेय ते बरोबर नाही असे अजित पवार म्हणाले. कुटुंबातील मोठ्या व्यक्तिंनी तरी सांगायला पाहिजे होते. आता जे घडतेय त्यावरून साहेबांनी आमचे तात्यासाहेबांचे घर फोडले असे म्हणायचे का. मी जीवाला जीव देणारा माणूस आहे. पण या सगळ्या संदर्भात इतक्या खालच्या पातळीवर राजकारण आणू नका. एकोपा ठेवायला पिढ्यान पिढ्या जातात, तुटायला वेळ लागत नाही, या शब्दात त्यांनी आपल्या भावना व्यक्त केल्या. ते पुढे म्हणाले, घरातील भांडण चार भिंतीच्या आत ठेवायचे असते. त्यात एकदा दरी पडली की सांधायला दुसरे कोणी येत नाही. सगळ्यांनी एकोप्याने राहिले तर घर पुढे जाते. मी काम करणारा माणूस आहे. विरोधक म्हणतात की फक्त इमारती, रस्ते, शाळा कॉलेज बांधले की विकास झाला का. मग त्यांची विकासाची व्याख्या तरी काय आहे, असा सवाल पवार यांनी केला.

बारामतीकरांनी गत निवडणूकीत सर्वाधिक मताधिक्याने विजयी केले. त्यामुळे बारामतीत गेल्या पाच वर्षात ९ हजार कोटींचा निधी आणला. मोठ्या प्रमाणावर विकासकामे झाली. आता विरोधक मलिदा गँग म्हणून हिणवतात. कसली मलिदा गँग. कामे आपल्याच भागातील ठेकेदारांना दिली ना. त्यातूनही त्यांच्याकडून काही चुकीचे घडले असेल तर मी कोणाला पाठीशी घालणार नाही. पण उगाच मलिदा मलिदा करून त्यांना नाऊमेद कणे योग्य नाही. कोणी चुकत असेल तर त्याला ब्लॅकलिस्ट करू असे पवार म्हणाले.

बारामतीच्या जनतेने लोकसभेला ताई, विधानसभेला दादा असे ठरवले होते. अर्थात हा दादा म्हणजे मी आहे अशी कोटी करत अजित पवार म्हणाले, इथे बसलेल्या अनेकांनी सुप्रियाचे काम केले. मी ते मान्य केले. लोकसभेनंतर मी नाराज होतो. मला शिरुरकर तेथून उभे रहा म्हणत होते. परंतु बारामतीतील कार्यकर्त्यांच्या रेट्यामुळे मी निवडणूक लढवत आहे. मला राज्यभर फिरायचे आहे. त्यामुळे बारामतीची प्रचाराची धुरा तुम्ही हाती घ्या असे आवाहन कार्यकर्त्यांना करत ते म्हणाले, तुम्ही पहिले आपले घर व्यवस्थित आहे का ते बघा, आपल्या गावावर लक्ष केंद्रीत करा. उगाच शेजारच्या गावात जावू नका. माझेच घर व्यवस्थित नाही म्हणून मला तुम्हाला बोलतानाही फार विचारपूर्वक बोलावे लागत असल्याचा टोला पवार यांनी हाणला. मला रात्रीच्या बारा वाजता बोलवा, मी हजर असेन. पण मागच्या निवडणूकीसारखे भावनिक होवू नका. विरोधकांकडे आता एकही मुद्दा शिल्लक नाही. तुम्ही जेवढ्या मताधिक्याने विजयी कराल तेवढा अधिकचा निधी मी बारामतीला देईन, असा शब्द त्यांनी उपस्थितांना दिला.