आजच्या डिजिटल युगात वाढत्या सायबर फसवणुकीच्या पार्श्वभूमीवर विद्यार्थ्यांमध्ये सायबर सुरक्षेबाबत जागरूकता निर्माण करण्यासाठी विद्या प्रतिष्ठान कला, विज्ञान व वाणिज्य महाविद्यालय, बारामती आणि क्विक हील फाउंडेशन यांच्या संयुक्त विद्यमाने ‘सायबर शिक्षा फॉर सायबर सुरक्षा’ हा उपक्रम राबविण्यात येत आहे.

या उपक्रमांतर्गत नुकताच बारामतीतील जिजाबाई गावडे महाविद्यालय, पारवाडी येथे विशेष जनजागृती कार्यक्रम आयोजित करण्यात आला. या कार्यक्रमात अंकुर मिश्रा आणि रोहन देचौधरी यांनी विद्यार्थ्यांना सायबर स्कॅम्स, ऑनलाइन फ्रॉड व विविध फसवणुकीच्या तंत्रांविषयी सविस्तर मार्गदर्शन केले.

सत्रादरम्यान विद्यार्थ्यांना इंटरनेटवर अनोळखी लिंक्सवर क्लिक न करणे, सुरक्षित पासवर्डचा वापर करणे, सोशल मीडियावरील वैयक्तिक माहिती सुरक्षित ठेवणे आणि शंका असलेल्या ईमेल्स किंवा मेसेजेसवर विश्वास न ठेवणे याबाबत विशेष सूचना देण्यात आल्या.

विद्यार्थ्यांनी विविध उदाहरणे व प्रात्यक्षिकांच्या माध्यमातून ऑनलाइन फसवणूक कशी ओळखावी व त्यापासून स्वतःचे संरक्षण कसे करावे याचे सादरीकरण केले.

या उपक्रमातून सायबर सुरक्षा व डिजिटल जागरूकतेची अपरिहार्यता अधोरेखित झाली असून, विद्यार्थ्यांनी अशा उपक्रमांची शाळा-­महाविद्यालयांमध्ये सातत्याने गरज असल्याचे मत व्यक्त केले.