बारामती इंडस्ट्रियल डेव्हलपमेंट असोसिएशन (BIDA) ने मांडलेल्या विविध मागण्या आणि सुरक्षेसंदर्भातील सूचनांवर तात्काळ कार्यवाही केली जाईल, अशी ग्वाही बारामती ग्रामीण पोलिस ठाण्याचे निरीक्षक चंद्रशेखर यादव यांनी दिली.

बारामती एमआयडीसीतील उद्योजक व कंपनी प्रतिनिधींची बैठक गुरुवारी (दि. ६) ग्रामीण पोलिस स्टेशनमध्ये आयोजित करण्यात आली होती. या बैठकीस एमआयडीसीचे प्रादेशिक अधिकारी हनुमंत पाटील हे देखील उपस्थित होते.

बैठकीला 'बिडा' असोसिएशनचे अध्यक्ष धनंजय जामदार, उपाध्यक्ष मनोहर गावडे, हरिश्चंद्र खाडे, हरिष कुंभारकर, पियाजोचे चंद्रकांत काळे, डायनामिक्सचे मुकेश चव्हाण, रॅक एन स्पेसचे संचालक नितांत कोठारी, एमआयडीसीचे उपअभियंता उपेंद्र गलांडे, रामचंद्र माने यांच्यासह अनेक उद्योग प्रतिनिधी उपस्थित होते.

दरम्यान या बैठकीत एमआयडीसी परिसरात नवीन पार्किंग झोन तयार करणे, पेन्सिल चौकातील सिग्नल यंत्रणा सुरू करणे, अंतर्गत रस्त्यांवर स्पीड ब्रेकर्स व ब्लिंकर्स बसवणे, फेज 2 व विमानतळाजवळ पोलीस चौकी उभारणे, चोऱ्यांना आळा घालणे, भंगारवाल्यांची नोंद ठेवणे, सीसीटीव्ही कॅमेऱ्यांची व्याप्ती वाढवणे, कामगारांची पोलीस पडताळणी सक्तीने करणे, महिला कामगारांच्या सुरक्षेसाठी विशेष बंदोबस्त ठेवणे, सूचनापेट्या बसवणे, तसेच गस्त वाढवणे यांसह पेन्सिल चौक ते गदिमा रस्त्यावर दुचाकीव चारचाकी वाहनांसाठी स्वतंत्र पार्किंग व्यवस्था, तसेच उद्योग संवाद कक्ष सुरू करण्याची मागणी उद्योजकांच्या वतीने करण्यात आली.

उद्योजकांच्या सूचनांवर तात्काळ आणि समन्वयित कार्यवाही होईल, तसेच संबंधित शासकीय विभागांशीही समन्वय साधून प्रश्न सोडवले जातील, अशी ग्वाही प्रादेशिक अधिकारी हनुमंत पाटील यांनी यावेळी दिली.